Gipasidad-an sa Department of the Interior and Local Government o DILG ang mga kawani sa Bureau of Fire Protection o BFP nga mahimong nalambigit sa gitawag nga “slot for sale” modus atol sa nationwide recruitment alang sa kapin 2,000 ka bakanteng posisyon sa ahensya.
Nahimo kini human nadakpan ang usa ka Senior Fire Officer 1 nga giingong nangayo og 300 mil pesos gikan sa usa ka aplikante baylo sa recruitment slot.
Gikustodiya na karon sa Criminal Investigation and Detection Group o CIDG ang suspek, nga nag-atubang og kasong robbery-extortion.
Matod ni Interior Secretary Jonvic Remulla, seryoso ang DILG sa paglimpyo sa BFP batok sa korapsyon ug kinahanglan manubag ang bisan kinsa nga mapamatud-ang nalambigit sa maong modus.
Dugang pa ni Remulla, kapin 200 ka personnel ug pipila ka regional directors ang giimbestigahan tungod sa suspetsa nga konektado sa maong anomalya.
Gituohang moabot sa 100 mil hangtod 800 mil pesos ang ginapangayo sa matag transaksiyon.
Aron mapugngan ang korapsyon, gipadayag sa DILG ang e-hiring recruitment system nga gitumong sa pagpakunhod sa human intervention sa unang bahin sa proseso.
Tumong usab niini nga mapaspas ang recruitment, mapalig-on ang transparency, ug maminusan ang gasto sa mga aplikante.
