Gidagsa sa mga fans sa Cebu si NBA legend Derrick Rose atol sa iyang “Rose Meets the Queen” event sa SM Seaside City Cebu kagahapong adlawa, diin kusog nga misinggit ang mga tawo og “MVP!” sa iyang paggawas.
Gipahayag ni Rose nga wala niya damha ang kainit sa pagdawat sa mga Cebuano fans ug dako kini og kahulugan alang kaniya, ilabi na kay wala siya magtuo nga daghan ang nakaila ug nakasubay sa iyang NBA career.
Daghang fans ang nagsul-ob og replica jerseys gikan sa iyang panahon sa Chicago Bulls, samtang ang uban nagdala og litrato ug signature shoes nga ilang gilauman mapapirmahan sa 2011 NBA Most Valuable Player.
Atol sa event, nakigkita usab si Rose sa pipila ka local players nga miapil sa usa ka 3×3 tournament, lakip si former PBA player JR Quinahan.
Ang mall appearance maoy nagtapos sa duha ka adlaw nga pagbisita ni Rose sa Cebu. Una niini, mibisita siya sa Mactan Shrine ug mitambong sa usa ka private event sa Shangri-La sa Lapu-Lapu City.
Mao kini ang unang pagbisita ni Rose sa Cebu human sa iyang nangaging trips isip brand ambassador sa Manila. | VIA BOMBO EROS PAJOTA
