DAVAO CITY – Nakatala og usa pa ka kompirmadong kaso sa Chikungunya Virus infection nga midugang sa kinatibukang ihap nga duha na ka kaso dinhi sa syudad , partikular na sa Barangay Ilang.
Sumala kang Melodina Babante, Assistant Coordinator sa Davao City Health Office-Tropical Diseases Prevention and Control Unit, mag inahan ang nagpositibo sa maong sakit, diin ang unang gireport nila usa lamang. Giila ang nagpositibo nga usa ka babae, 39 anyos , ug ang anak niini nga 12 anyos, puros residente sa Purok 27, farmville, Brgy. Ilang, Bunawan District ning syudad sa Davao.
Nasayran, nga naulian na ang anak niini, apan nagpabilin gihapon ang sintomas sa inahan nga nakasinati pa og sakit sa luta-lutahan ug tuhod. Nag-inom sab kini og vitamin c, gilaumang hingpit siya marekober gikan sa maong sakit. Samtang, nagpadayon gilusad sa buhatan ang pangangampanya batok sa lamok aron mabatukan ang dengue ug chikungunya fever.
Gipamugos usab ni Babante ang kamahinugndanon alang sa mga Dabawenyos nga tumanon ang 4-S – o ang search and destroy mosquito-breeding sites, ipatuman ang self-protection pinaagi sa pagsul-ob ug long-sleeved shirts ug pantalon ug paggamit matag adlaw ug mosquito repellent, pagkonsulta ug sayo sa doktor.
