Gipatin-aw ni Interior Secretary Jonvic Remulla ang iyang proposal nga tugotan ang kapulisan sa pag-inspeksyon sa lugar diin gitipigan sa mga licensed gun owner ang ilang armas.
Matod ni Remulla, dili kini himuon pinaagi sa search warrant. Hinuon, ubos sa iyang proposal, papirmahon ang mga gun owner og waiver nga motugot sa kapulisan nga mobisita ug mo-inspeksyon sa ilang firearm safekeeping area, uban sa usa ka adlaw nga pahibalo.
Tumong niini nga masiguro nga luwas ug naka-lock ang mga armas ug dili dali ma-access sa mga menor de edad.
Pagpasabot sa DILG chief nga ang gun ownership adunay tugbang nga responsibilidad sa hustong safekeeping sa armas.
Sugyot ang maong lakang human sa mga insidente sa pagpamusil sa mga eskwelahan diin giingong naka-access ang mga menor de edad sa mga armas nga iya sa ilang ginikanan o kapamilya.
Nagkanayon usab ang Philippine National Police nga tun-an ug konsultahon pa nila ang mga stakeholders kabahin sa proposed home inspection policy sa dili pa kini ipatuman.
