DAVAO CITY – Bisan nga mas lu-ag na matud pa karon ang pipila ka bahin sa nasud ilalom sa alert level 1, ingon man ubos nga kaso sa Covid-19, gikanayon ni Mayor Sara Z. Duterte-Carpio nga wala pay plano ang lokal nga kagamhanan nga tangtangon na ang pagsul-ob ug facemask.
Gikanayong hulaton pa sab karon sa lokal nga kagamhanan ang ipagula nga memo gikan sa Department of Health kalabot sa maong hisgutanan.
Apan alang kang Mayor Inday, mas maayong dili una tanggalon ang mandatory mask wearing sanglit muabot ang panahon nga subli na sab nga ibalik ang maong kamandoan nga maoy hinungdan nga masuko na himuon ang mga tawo.
Mamahimo sumala pa nga temporaryo lamang kini nga tangtangon ug ibalik lamang kini sulod sa usa o duruha ka semana.
Bugtong ang mga public health experts lamang sab ang makadesisyon kalabot sa maong hisgutanan ug ang siyudad maoy mo-comply sa maong rekomendasyon.
Kahinumduman nga ang mandatory wearing of face mask, ang labing una nga minimum public health standard (MPHS) nga gipatuman sukad nga natala ang kaso sa Covid-19 sa nasud sayo sa tuig 2020.
Sa gipagula nga Executive Order (EO) No. 11 Series of 2022, o “An Order Lifting All Covid-19 Restrictions in Davao City,” gitangtan na ang uban nga mga Covid-19 protocols ug guidelines sama sa paggamit ug DQR alang sa contact tracing ug ang one-meter social distancing apan gipabilin ang pagsuot ug face masks.
Ang mga madakpan nga makapalas sa Davao City Ordinance No. 0307-20 o ang mandato nga pagsuot ug facemask sa mga pampublikong lugar mamahimong multahan ug P500 alang sa first offense; P2,000 sa second offense; ug P5,000 o usa ka bulan nga pagkabilanggo alang sa third offense.
Ang mga facemask violator nga pakyas sa pagbayad ug multa mamahimong mag-atubang ug kaso.
