DAVAO CITY – Dungan sa nagkaduol nga eleksiyon sa bulan sa Mayo niining kasamtangan nga tuig, nagpagula karon ug Circular No. 33 si Davao Archbishop Romulo Valles nga nagpahinumdom sa tanan nga mga pari ug uban pang mga lideres ilalom sa Archdiocese of Davao nga kinahanglan pabilin ang mga nahisgutan nga non-partisan sa nagsingabot nga 2022 national and local elections.
Gawas sa mga pari, gitambagan sab niini ang mga Gagmayng Kristohanong Katilingban (GKK) leaders ug uban pang nalambigit sa simbahan nga kinahanglan ipabilin ang non-partisan sa mga elections related activities.
Gi-awhag sab sa kanhi Catholic Bishops’ Conference of the Philippines (CBCP) president, ang mga simbahan nga suportahan ang mga aktibidad sa Parish Pastoral Council for Responsible Voting (PPCRV).
Kahinumduman nga ang PPCRV usa ka election watchdog ilalom sa Roman Catholic Church in the Philippines nga accredited sa Commission on Elections.
Gipahinumduman sab ni Valles ang publiko nga pabilin pa gihapon nga mag-doble amping bisan nga ilalom na ang dakbayan sa Alert Level 1 sanglit nagpabilin pa gihapon ang bahad sa Covid-19.
Kahinumduman nga una na sab nga nagpagula ang CBCP ug Pastoral Letter sa 2022 elections sa milabay nga bulan nga nagpahimangno sa mga botante nga mahinungdanon ang ilang boto.
