DAVAO CITY – Gikatakdang ipa-ilalom sa state of calamity ang municipalidad sa Sto Tomas, Davao del Norte gumikan sa nasinatiang pagbaha nga naka-apekto sa libuan ka mga pamilya ug naka-damyos sa pipila ka mga impreastraktura.
Gikanayon ni Atty Elisa Evangelista-Lapena, municipal administrator sa Sto Tomas nga karong hapon gikatakdang managtagbo ang mga miembro sa Municipal council aron hisgutan ang pagduso ug resolution alang sa pagpa-ilalom sa ilang dapit sa state of calamity.
Tumong niini nga magahinan ug igong kantidad sa lokal nga kagamhan ang mga biktima sa baha partikular na ang pagtunol ug hinabanbg kanila nga pagkaon, medisina ug uban pang mga panginahanglanon.
Subay sa initial assessment sa municipal social welfare and development office moabot sa 3,694 ka mga pamilya ang naapektuhan sa pagbaha gikan sa siyam ka mga barangay sa Sto Tomas.
Dugang pa ni Atty. Elay nga duha na usab ka mga tulay sa Barangay Kinamayan ang nahugmak gumikan sa kusog nga bul-og sa tubig baha.
Ang siyam ka mga apektado barangay sa Sto Tomas ang gilankguban sa Barangay Kinamayan nga adunay 1,200 ka mga apektadong pamilya, San Miguel – 1,120 ka mga pamilya, Kasig-ang 403 pamiloya; New Catipunan – 601 pamioya; Talomo 19 pamilya; Lungaog – 116 ka pamilya, Salvacion 235 ka pamilya, Kimamon 9, ug Brgy Bobongon 41 ka mga pamilya.
Nabalaka si Atty Evangelista nga dili pa makabalik sa ilang tagsa-tagsa ka mga pinoy-anan ang mga bakwit gumikan kay nagpadayon gihapon ang mga pag-ulan karong panahona ug posibling dili gihapon mohubas ang tubig baha.
