DAVAO CITY – Nagpadayon karun ang pahimangno sa ahensiya sa Department of Health-Davao Region (DOH-Davao) ngadto sa publiko nga ipadayon ang paghimo ug mga lakang arun nga batukan ang pagsaka kaso sa dengue sa Davao Region.
Una ng gibutyag sa DOH nga sukad Enero 1 hangtud Abril 2, 2022 nakatala ug pagsaka sa dengue kung itandi sa susama nga panahon kaniadtong 2021.
Sa ulahing datus sa DOH-Davao, ang rehiyon ang nakatala ug 1,308 dengue cases karung 2022 samtang 1,255 ka mga kaso sa milabay nga tuig.
Samtang dyutay sab nga misaka ang mga natalang namatay nga anaa sa unom karung 2022 samtang lima kaniadtong 2021.
Subay sa breakdown sa kaso sa matag probinsiya ug siyudad sa rehiyon karung 2022, ang Davao City ang nag-una sa mga adunay pinakataas nga kaso apan miubos kini ug 449. Tanan nga mga kaso sa probinsiya gawas sa Davao Occidental ang nakatala ug pagsaka sa kaso sa dengue.
Ang Davao del Sur ang anaa sa ikaduha nga anaa sa 284, gisundan sa Davao del Norte nga adunay 281.
Samtang ang Davao Oriental nakatala ug upat ka pilo nga pagsaka nga anaa sa 149, gisundan sa Davao de Oro uban ang 125 nga mas doble kung itandi sa milabay nga tuig.
Ang dakbayan sa Davao sab ang adunay pinakataas nga ihap nga kaso sa matag siyudad o munisipalidad karung tuiga nga adunay 449 (usa ang namatay ), gisundan sa Digos City Davao del Sur uban ang 119 ka kaso (usa ang patay), Panabo City Davao del Norte uban ang 111 ka kaso (usa ang patay), ug Mati City sa Davao Oriental uban 109 ka kaso.
Samtang sa age group kapin 52 percent sa kaso ang mga lalaki samtang 25 porsyento ang gikan sa age group nga singko hangtud nuebe anyos.
Una ng gibutyag ni DOH-Davao Assistant Regional Director Dr. Gerna Manatad nga nakiglambigit na sila karun sa mga nagkadaiyang local government units (LGU) arun nga masolusyonan ang kaso sa dengue sa nagkadaiyang lokalidad.
Samtang sa bahin sa DOH, mihimo na sila ug mga nagkadaiyang mga lakang lakip na ang pagpalig-on sa information campaign ug monitoring sa health facilities ug activities isip kabahin sa National Aedes Borne Viral Diseases Prevention and Control Program.
Nanawagan sab si Manatad nga pahugtan pa ang spraying sa mga creeks, establishments, tulonghaan ingon na ang ginapahigayon nga mga clean-up drives.
