DAVAO CITY – Daku ang pagtuo sa ahensiya sa Department of Tourism (DOT) Davao Region nga ang subli nga pag-abli sa Mount Hamiguitan Range Wildlife Sanctuary (MHRWS) makatabang arin nga mapalig-on ang pagpaningkamut sa rehiyon arun nga maila isip “top-of-mind destination for culture, adventure and nature,”.
Sumala pa kang DOT regional director Tanya Rabat-Tan nga ang Mount Hamiguitan sa Davao Oriental ang maka-awhag dili lamang sa mga mountaineers apan lakip na sa mga naturalists ug environmentalists sa tibuok nasud.
Kahinumduman nga una ng giila ang Mt. Hamiguitan isip usa sa mga United Nations Educational, Scientific and Cultural Organization (UNESCO) world heritage site kaniadtong Hunyo 23, 2014 ug gideklara sa Association of Southeast Asian Nation (ASEAN) Heritage Park kaniadtong Oktobre 21, 2014.
Human ang pag-apruba sa Protected Area Management Board (PAMB), gi-anunsiyo sa Protected Area Management Office (PAMO) sa MHRWS nga abli na ang bookings niini alang sa mga trekkers ug mountaineers nga buot musaka sa Mount Hamiguitan.
Subay sa simplified guidelines alang sa trekking, mountaineering, ug uban pang mga aktibidad sa MHRWS, ang gitugot nga ihap sa mga trekkers sa matag trekking duration sa tulo ka adlaw sa campsites dili kalakip ang eco-guides ug porters ang gipaubsan gikan sa 30 ngadto na sa 15.
Una na sab nga gibutyag ni Rabat-Tan nga kinahanglan nga siguruhon sab sa mga trekker nga mutamud ang mga nahisgutan sa mga mahinungdanon nga safety measures ayha musaka sa bukid.
