DAVAO CITY – Gumikan sa mga nasinati-ang pag-ulan sa dakbayan sa Davao karong panahuna, gitambagan sa lokal nga kagamhanan ang mga residente ilabi na sa mga lugar nga baha-unon nga mag-amping batok sa leptospirosis gumikan kay sagad makuha kini sa tubig-baha nga kontaminado sa kagaw.
Dugang gikanayon nga kung mahimo, likayan una ang pagtamak sa baha ilabi na kung adunay samad.
Kung kahinumduman, gipahayag ni Dr. Maria Theresa Bad-ang, nephrologist ug head sa Southern Philippines Medical Center-human advocate and retrieval effort, ang leptospirosis usa ka matang sa bacterial infection nga pweding mahimong hinungdan sa pagkadaot sa kasing-kasing, liver ug kidney kung magrabihan na ang nabiktima niini.
Ang maong matang sa bacteria ang makuha sa tubig, yuta ug bisan sa mga pagkaon nga kontaminado sa ihi sa mga infected nga mananap ilabi na sa ilaga.
Pipila sa mga symptoms nga masinati-an sa higayong mataptan ang usa ka tawo sa leptospirosis mao ang kalintura, muscle pain, pagpanakit sa ulo ug pagpamula sa mata ug sa higayong mugrabe ang infection, mamahimong mupadulong kini sa liver ug kidney failure.
