DAVAO CITY – Gikanayon ni Jenielito “Dodong” Atillo, tigpamaba sa DepEd Region 11, nga nagkadaghan na karon ang mga pampubliko ug pribadong tulonghaan sa Davao region nga nakapahigayon na ug tradisyonal nga face to face classes dungan sa pag-ubos sa kaso sa Covid-19.
Sumala pa kang Atillo, anaa na karon sa 362 ka mga private ug public sa schools sa rehiyon ang nagpahigayon ug face to face learning modality.
Apan ang nahisgutan nga ihap ang mas ubos pa gihapon sa kinatibuk-ang 2,699 ka mga tulonghaan sa rehiyon sanglit ang mga tulonghaan matud pa ang gawasnon nga makadesisyon kung mubalik na sila sa tradisyonal nga face to face classes o magbalilin sa online mode nga klase.
Gikanayong ang pagsaka sa ihap sa mga tulonghaan matag semana ang magsilbi nga maayo nga signal arun nga sagupon sa mga bata ang new normal nga klase sa pagtuon luyo sa nagpadayon nga bahad sa pandemiya.
Hinuon gibarugan sa Deped nga angayan pa gihapon nga mo-comply ang usa ka tulonghaan sa school safety and assessment tool (SSAT) nga maoy nag-unang rekisitos sa aplikasyon sa mga tulonghaan ayha kini tugtan nga makapahigayon ug klase.
Nasayran sab kang Atillo nga sa milabay nga Marso 14-18, nakatala ang DepEd 11 ug 47 ka mga estudyante ug personahe nga nakaangkon ug sintomas sa Covid-19 apan susama na nga fully recovered ang mga nahisgutan.
Samtang una ng gibutyag sa lokal nga kagamhanan nga mamahimo pa gihapon nga pabakunahan ang mga bata nga edad singko ngadto na sa 11 anyos sa mga mall sama sa SM City Davao, SM Lanang Premier,Gaisano Mall Bajada, Abreeza Ayala Malls, Gaisano Mall Toril, Gaisano Mall Calinan, ug Gaisano Mall Tibungco arun masiguro ang proteksiyon sa ilang panglawas dungan sa pagbalik sa face to face classes.
