DAVAO CITY – Nagpagula ug kamandoan ang lokal nga kagamhanan pinaagi sa Executive No. 10, Series of 2022 diin hugtanon nga idili ang pagpahigayon ug political caravans ug motorcades.
Adunay mga guidelines ang nahisgutan nga kamandoan nga mao ang paghatag ug guidelines arun lamang matuman ang required permit aron lamang mapahigayon ang 2022 election campaign related activities sa siyudad sa May 7.
Unod sa EO nga kinahanglan nga likayan ang motorcades ug caravans gumikan sa padayon nga pagsaka sa presyo sa mga produktong petrolyo ug mamahimong hinungdan sab kini sa paghuot sa dagan sa trapiko sa dakbayan.
Gisagop sa siyudad ang Commission on Elections Resolution No. 10732, Series of 2021, diin adunay guidelines sa pagpahigayon ug In-person campaign, rallies, caucuses, meetings,conventions, ug miting de avance ilalom sa new normal isip koneksiyon sa nagsingabot nga eleksiyon.
Tanan sumala pa nga mga political parties ug organizers kinahanglan nga makiglambigit sa Regional o District Election Officer kung adunay ipahigayon nga mga aktibidad.
Gitino sab sa kamandoan nga ang siyudad dili na mag-require sa tanan nga mga political parties ug organizers nga muduso ug permit o application alang sa maong aktibidad gawas sa bayaran nga regulatory fees nga gi-require sa balaud o ordinance.
Nasayran nga ang political activity ilalom sa Resolution 10732 gawas sa Section 16 ang aprubahan gilayon sa higayon nga makabayad na niini.
Sa higayon nga makalapas sa EO, mamahimo kini nga masilotan ilalom sa existing laws, ordinances, rules and regulations.
Kahinumduman nga ilalom karon sa Alert Level 1 status ang siyudad hangtud Marso 15, 2022.
