DAVAO CITY – Nagpahayag ug kabalaka si Assistant Secretary Romeo Montenegro, sa Mindanao Development Authority (MinDA), sa nagpadayon nga kagubot karun sa Ukraine ug Russia gumikan sa posibilidad nga mas momahal pa ang presyo sa petroleum, nga hinungdan sab nga mo-usbaw pa ang presyo sa mga pletihan.
Usa sumala pa sa mga maapektohan niini ang mga exporters dinhi sa Mindanao sa paghuyang sa global demand.
Angayan sumala pa nga magpabilin nga neutral ang nasud sa nagpadayon nga giyera tali sa Russia ug Ukraine aron nga dili mabutang sa risgo ang interes.
Gikanayong walay kalambigitan ang Pilipinas sa bangi sa duruha ka mga nasud apan kinahanglan nga ipatigbabaw ang diplomasiya sa matag international conflict.
Angayan sab sumaka pa nga mangandam ang nasud sa mamahimong epekto sa Russia-Ukraine tension sanglit muhatud gayud kini ug epekto sa ekonomiya ilabi na sa aspeto sa food security sanglit ang nahisgutan nga bangi muhatud sab ug epekto sa global community. Aduna sab sumala pa kini domino effect ngadto sa katawhan ilabi na kung hisgutan ang ilang mga galastuhon.
Kahinumduman nga usa karon ang gobyerno sa Pilipinas sa miboto ug “yes” sa UNGA resolution nga nagkondina sa gihimong pagpangatake sa Russia ngadto sa Ukraine.
