DAVAO CITY – Gipahibalo ni Generose Tecson, head sa City Tourism Operations Office (CTOO) nga sama sa milabay nga mga katuigan, pabilin pa gihapon nga online ang kasaulogan sa 85th Araw ng Dabaw karung bulan sa Marso.
Una ng nasayran sa nahisgutan nga dili na nila mamahimong bag-ohon ang plano bisan nga gilu-agan na karon ang restrictions sa dakbayan ngadto sa Alert level 2 gumikan kay nakahan-ay na kini kaniadtong anaa pa lamang sa Alert level 3 ang siyudad.
Sumala pa kang Tecson nga pipila sa mga aktibidad nga gi-andam karong katuiga ang gilangkuban sa Misa Pasasalamat, Hugyaw o opening sa Araw ng Dabaw, ug Tilaw Dabaw nga salmutan matud pa sa mga nagkadaiyang restaurant sa siyudad.
Gitataw sab ni Tecson nga adunay gi-andam ang dakbayan nga pasundayag aron nga pasalamatan ang mga mitabang sa siyudad sukad nga nagsugod ang pandemiya. Adunay presentasyon usab ang mga nakadaug sa mga kompetisyon sa Araw ng Dabaw sukad 2016 hangtud 2020.
Kahinumduman nga kini na ang ikatulo ka tuig nga kasaulogan sa maong aktibidad nga gihimo online gumikan sa epekto nga gihatud sa Covid-19.
Ang Araw ng Davao live sumala pa nga masaksihan sa FB page sa City Government of Davao ingon man sa Davao City Tourism Office page.
