DAVAO CITY – Dungan sa paglu-ag sa mga community restrictions sa siyudad, gitugtan na karon sa lokal nga kagamhanan ang pagpadayon sa face-to-face classes human ang duruha ka tuig na nga remote learning gumikan sa coronavirus disease (COVID-19).
Dili sumala pa musupak ang lokal nga kagamhanan kung unsa man ang desisyon sa mga tulonghaan kung itugot na niini ang in-campus classes sa mga estudyante basta kay mutuman sa minimum public health standards (MPHS) aron malikayan nga matakdan sa infection.
Gitambagan ang mga private ug public basic education institutions nga mo-apply ug resumption sa face-to-face classes sa Department of Education (DepEd) samtang ang mga colleges and universities o higher education institutions ang sa Commission on Higher Education (CHED).
Mamahimo na sumala pa kini nga ipadayon human nga pipila na sab ka mga tulonghaan sa Metro Manila ang nagapatuman na ug in-campus classes.
Gitataw sab sa Mayor nga ang lokal nga kagamhanan ang wala pa nakadawat ug bisan unsa man nga report gikan sa DepEd-Davao kalabot sa mga dili maayong insidente gikan sa lima ka mga pilot schools sa siyudad nga nagtugot sa pagpadayon sa face-to-face classes.
Gitambagan sab ang mga tulonghaan nga mo-comply sa MPHS, ilabi na ang pagsuot ug face mask, pagtuman sa physical distancing, ug kanunay nga manghugas ug kamut ang mga estudyante aton nga makunhuran ang pagtakod-takod sa COVID-19.
Laraw sab sa dakbayan nga hinay-hinay na nga makabangon ang mga aktibidad ilabi na sa ekonomiya nga maoy grabe nga naapektohan sa pandemiya.
Kahinumduman nga kalakip ang dakbayan sa mga lugar sa Davao region nga gipailalom karon sa Alert Level 2 kauban ang lalawigan sa Davao del Sur, Davao del Norte, ug Davao Oriental.
Samtang pabilin sa alert level 3 ang mga probinsiya sa Davao de Oro ug Davao Occidental.
