DAVAO CITY – Anaa sa upat ka mga lugar sa Davao region ang balik na sa mas lu-ag nga Alert Level 2 status kini human namatikdan nga adunay dakong kalambuan sa Covid-19 situation sa nagkadaiyang areas sugod sa Pebrero 16 hangtud Pebrero 28, 2022.
Pipila sa nahisgutan nga mga lugar ang gilangkuban sa Davao City, Davao del Sur, Davao del Norte, ug Davao Oriental nga susama anaa sa Alert Level 2 hangtud sa katapusan ning bulana.
Samtang ang Davao de Oro ug Davao Occidental, ang pabilin nga anaa sa Alert Level 3 sa susama nga panahon.
Kahinumduman nga susama sab nga gipailalom sa milabay nga bulan sa Alert Level 3 status ang mga lugar sa Davao region human nga nasinatian ang surge sa Covid-19 cases, nga maoy hinungdan nga na-okupa ang tanan nga mga ICU ug Ward beds sa ospital nga alang sa mga covid-19 patients.
Sumala pa kang Dr. Rachel Joy Pasion, Department of Health (DOH-Davao) Regional Epidemiology Surveillance Unit head, ang nasinatian nga surge sa pipila ka mga lugar sa Davao region ang tungod sa pagtapok-tapok ug pagtinakdanay sa mas makatakod nga Omicron variant.
Kahinumduman nga miabot sa 111 ang positive specimens sa Omicron ang natala sa Davao region apan gilayon kini nga nakontrola ug naka-recover gilayon ang mga natakdan.
Dakung tabang sumala pa ang pagpabakuna gumikan kay sagad sa mga pasyente ang nakasinate lamang ug mild o asymptomatic nga sintomas.
