DAVGAO CITY – Gibutyag ni Kingdom of Jesus Christ founder Apollo Quiboloy nga nakadawat sumala pa siya ug bahad sa kinabuhi.
Gani gipahinumdoman sa Pastor ang mga nagbahad kaniya nga protektahan man siya sa labaw’ng makagagahom o dili, magpadayon matud pa iyang tingog ug dili siya mohunong. Gani mas mokusog matud pa kini aron nga batukan ang mga dautan nga binuhatan.
Dili matud pa siya moluwat ug bisan unsa man nga mga pulong kung dili siya andam sa bisan unsa man nga mahitabo.
Gitataw sab niini nga sa mga nagbahad kaniya nga dili lamang karon, wala sumala pa siya nagtago-tago. Gani mamahimo sumala pa niya nga ibutyag kung unsa ang iyang schedule ug asa siya karung panahona.
Kahinumduman nga subling miinit ang pangalan sa pastor human nga gipagula ang wanted poster niini sa Federal Bureau of Investigation (FBI) sa Amerika gumikan sa kasong sex trafficking ug uban pang mga reklamo kauban ang laing duruha ka mga kaubanan niini sa ministriya.
Una na sab nga gibutyag sa mga legal counsel sa pastor nga walay plano nga magtago-tago ang pastor ug andam sumala pa kini nga atubangon ang mga kaso nga giduso batok kaniya.
