DAVAO CITY – Gibutyag ni Hermie Escalante, chapter program manager, Family planning Organization of the Philippines, nga nagpabilin karon nga suliran dili lamang dinhi sa nasud kung dili lakip na dinhi sa dakbayan sa Davao ang isyu sa sayo nga pagbuntis sa mga kabataan.
Gani subay sumala pa sa ilang datus ang Davao ang nakatampos ug mas taas nga kaso niini sa milabay nga tuig.
Gani bisan kadtong nagsugod ang pandemiya, daghanan pa gihapon silag natala nga mga kabataan nga sayo nga nagbuntis luyo sa hugtanon nga mga restrictions nga gipatuman niadtong panahona.
Dinhi sumala pa sa dakbayan sa Davao, anaa sa 13 anyos ang pinakabata nga nadala sa ilang clinic human nga kini ang nabuntis.
Usa sa mga hinungdan niini ang kulang nga giya sa mga ginikanan hinungdan nga mahinungdanon sumala pa nga ipasabot ngadto sa mga bata ang dili maayo nga epekto sa higayon nga sayo kini nga magmabdos ilabi na nga dili pa sab andam ang lawas niini nga magsabak ug mamahimong mabutang lamang sa risgo ang iyang kinabuhi.
Nagtoo sab si Escalante nga mas maayong palig-onon pa karon sa Department of Education ang pagtudlo ug sex education sa mga kabataan ilabi na nga nagkabata na sab karon ang mga nalambigit sa pagpakighilawas diin kadaghanan sab niini ang dili andam nga huptan ang dakong responsibilidad.
