DAVAO CITY – Nakatala og 86 percent nga pagsaka sa total crime incidents ang Davao Region niadtong milabayng tuig. Kini mismo ang gikumpirma nsa tigpamaba sa Police Regional Office XI nga si Police Major Eudisan Gultiano.
Sagad sa mga natalang krimen sa rehiyon ang paglapas sa COVID-19-related policies, traffic violations, ug paglapas sa RA 9165 kon Comprehensive Dangerous Drugs Act of 2002.
Hinuon, sumala ni Gultiano, pamatuod kini nga mas nagalig-on ang ilang pagpatuman sa balaod.
Sa pikas bahin, mikunhod ngadto sa 23 percent ang index crimes sama sa murder, homicide, robbery, physical injury, ug uban pa dini sa Rehiyon Onse.
Usa sab kini ka pamatuod nga malinawon ug secured ang tibuok rehiyon, dugang pa sa opisyal.
Nagaandam na sab ang PRO XI alang sa umalabot nga election season, ug dunay special task force unit nga gitagana alang sa pagbantay sa mga border checkpoint, pagpatuman sa gun ban, monitoring sa posibleng pagkamugna sa private armed groups, ug ang pag-evaluate sa mga dapit nga potential election hotspots nga manginahanglan og dugang seguridad.
