DAVAO CITY – Nagpadayag sa iyang kadismaya si Jay-ar Miel, residente sa Barangay Bogo, Maasin City, Southern Leyte gumikan kay wala pa silay nadawat nga ayuda sukad nga gikuso-kuso sila sa Bagyong Odette.
Sumala pa kang Jay-ar nga usa sab sa ilang suliran nga gi-atubang karon mao ang mga natumba nga kahoy paingon sa ilang dapit hinungdan nga nalisdan sila nga makaadto sa ilang lungsod aron nga mupalit sa ilang mga panginahanglanon.
Bisan tuod nga walay grabe nga epekto ang Bagyo sa proper area sa Maasin Leyte, apan kadaghanan sa nahisgutan nga dapit ang nawad-an ug signal sa mga telecommunication companies.
Una na sab nga nasayran sa nahisgutan nga pipila sab sa mga istraktura sa ilang dapit ang nangadaut human nga grabeng gikuso-kuso sa bagyo diin kadaghanan ang nangalangkat ang atop.
Atol sa pag-igo sa Bagyo, dali sab nga nadala ang mga bata ug mga tigulang sa mas luwas nga dapit.
Subay sa nasayran si Jay-ar adunay usa ang natalang namatay sa kasikbit nila nga Barangay.
Suliran sumala pa karon sa ilang dapit ang supply sa tubig sanglit kinahanglan pa nila nga mubaktas ug 30 minutos ayha makaabot sa lungsod diin sila mamahimong makapalit sa ilang panginahanglanon.
