DAVAO CITY – Gipasiga na ang mga Christmas lights sa gawas sa Davao City Hall pipila ka minuto bag-o mag-alas sais kagabii. Mismong si Davao City Vice Mayor Sebastian Duterte ang nanguna sa mubo nga seremonya sa pagpasiga niini.
Sa iyahang pamulong, nagpahimangno si Baste sa publiko nga mutuman gihapon sa mga health ug safety protocol karong panahon sa Pasko, ug alang na usab sa pagsugat sa mas baskog nga bag-ong tuig.
Walay festivities nga gipahigayon karon sa lighting ceremony, dili sama sa naandan na sa lokal nga panggamhanan matag tuig tungod gihapon sa COVID-19 pandemic.
Gilaraw na usab nila nga ubay-ubay ang musuroy sa maong dapit, nga ilado nang laaganan matag panahon sa Kapaskuhan tungod sa hanindot nga Christmas lights ug display niini.
Sa pikas bahin, magpabilin gihapon nga online ang pamaagi sa pagsaulog ug pagpanghatag og pahalipay sa Pasko Fiesta niining tuiga.
Gipahibalo nila ngadto sa tanang interesadong Dabawenyo nga musalmot sa mga pagahimuong contests sa Davao PaskOnline Fiesta 2021, ug kinahanglan lang nga muadto sa Davao Pasko Fiesta Facebook page alang sa mechanics sa matag pa-contest.
