DAVAO CITY – Nangandam na karon si Davao City Mayor Inday Sara Duterte-Carpio sa iyang valedictory address inay state-of the city-address human ang pagduso niini sa iyang kandidatura alang sa pagka-bise Presidente.
Sa kasamtangan, gihan-ay ug gisapinal pa ni Mayor ang iyang mamahimong speech apan highlights sumala niini ang mga nahimo ilalom sa iyang administrasyon.
Gi-angkon sab niini nga bisan nagpadayon ang kahadlok sa mga tawo sa impact sa COVID-19, apan nagtoo ang nahisgutan nga aduna nay maayong kaugmaon sa umaabot nga mga panahon.
Nagpadayag sab sa ilang pagpasalamat ang Mayor sa mga residente ug sa ilang confidence ug kooperasyon.
Gani pagpamatuod sumala pa niini ang pag-ila sa siyudad bag-ohay lamang isip Top Performing Local Government Unit in Real Property Tax Collection ilalom sa city category human nga naka-kolekta ug P2.26 billion sa real property tax, o 190% sa collection efficiency.
Kahinumduman nga subling magpapili unta isip Mayor sa siyudad si Mayor Inday apan gi-withdraw niini ang iyang certificate of candidacy ug naka-desisyon nga modagan sa pagka-bise presidente bisan pa man nga daghanan sa iyang mga supporters ang nag-awhag kaniya nga mokandidato sa pagka-Pangulo pinasikad sa surveys diin una na kining nag-una sa presidential race.
