DAVAO CITY – Subling nagpahimangno ang Davao City Transport and Traffic Management Office kon CTTMO ngadto sa mga driver ug operator sa mga pampublikong sakyanan nga hugot gihapong ipatuman ang 50 percent nga passenger capacity.
Matud sa labaw sa CTTMO nga si Dionisio Abude, ang nasangpit nga kapasidad ang ginatugutan sa Department of Transportation kon DOTr samtang anaa pay pandemya.
Karong boluntaryo na lang usab ang pagmuntar og mga barrier sa mga pangpublikong sakyanan, mas gipahugtan nila ang ilang monitoring sa kadalanan aron siguruhon nga ginapatuman sa mga driver ang physical distancing sa ilang mga pasahero ug sa 50 percent nga allowed capacity.
Nagpasidaan usab ang opisyal ngadto sa mga magsinupakong driver nga maisyuhan sila og citation ticket nga dunay multa nga 500 pesos.
Kinahanglan usab nga sa mga driver magsugod ang disiplina sanglit sila ang maapiki kung dili nila makontrol ang gidaghanon sa ilang mga pasahero.
