DAVAO CITY – Gi-update sa Davao City LGU ang executive order nga naghimong boluntaryo na lamang ang pagsuot og face shields sa Dakbayan.
Sa gipagulang EO 51-B ni Acting Mayor Sebastian Duterte, gidugang ang probisyon nga naghatag og katungod sa mga opisina, ospital, ug uban pang mga establisamento nga ipa-require gihapon ang pagsuot sa face shields sa sulod sa ilang mga propyedad.
Tungod niini, kinahanglan nga mutuman sa mga empleyado, kliyente, ug mga guest sa mando sa mga nasangpit nga lugar.
Niadtong Nobyembre 2, gipagula ang orihinal nga EO 51-A nga gipirmahan ni Mayor Sara Duterte, nga naghimo na lamang nga boluntaryo ang paggamit sa nahisgutang protective equipment sa mga 3Cs kon crowded places, close-contact settings, ug confined and enclosed spaces.
Dili na usab kining kinahanglan suoton sa mga lugar nga dili makonsidera sa 3Cs.
Sa pikas bahin, gikanayon ni Davao City COVID-19 Spokesperson Dr. Michelle Schlosser nga mamahimo gihapong gamiton sa mga Dabawenyo ang face shield alang sa dugang proteksyon batok COVID-19.
