DAVAO CITY – Nanginahanglan pa karon ug taas-taas nga panahon ang lokal nga kagamhanan aron nga mahatagan ug kasulbaran ang suliran sa pagbaha ug uban pang climate hazards sa siyudad.
Kini ang gibutyag ang Interfacing Development Interventions for Sustainability (IDIS) human ang gipahigayon nga assessment sa massive flood nga nakaapekto sa daghanang mga areas sa siyudad ug hinungdan nga nagtapun-og ang daghanang mga basura.
Tungod niini, gi-awhag ni Atty. Mark Peñalver, executive director sa IDIS ang siyudad nga mas maayo mohimo ug mga lakang aron nga masolusyonan ang mamahimong impact sa pagbaha sama sa paspas nga pagpatuman sa “No to Single-use Plastic” Ordinance ug hugtanon nga pagpatuman ingon man monitoring sa Ecological Solid Waste Management Act.
Nanawagan sab ang IDIS sa hugtanon nga pagpatuman sa Local Zoning Ordinance, diin did-an ang residential developments ug subayon ang Floodway Mitigation Zones; ingon man pakusgan ang urban greenery ug protektahan ang blue spaces sama sa wetlands ug creeks; pagpatuman ug monitoring sa rainwater harvesting ug permeable pavement ordinance; ug pag-promotar sa nature-based solutions isa sa tanang mga proyekto nga mohatag ug kalambuan.
Girekomenda sab sa grupo ang paghatag ug prayoridad sa Drainage Master Plan aron masiguro nga mahatagan sab ug kasulbaran ang mga areas sa siyudad nga sagad baha-on panahon nga mobundak ang kusog nga pag-ulan.
