DAVAO CITY – Mi-arangkada gihapon kagahapong adlawa ang satellite voter’s registration sa usa ka dakong mall sa Ecoland ning Dakbayan.
Gigamit isip registration sites ang duha ka sinehan niini aron daghan ang maakomodar ug aron usab masiguro ang physical distancing.
Midagsa usab ang mga buot magparehistro gikan sa Unang Distrito, nga maoy ginaakomodar sa nasangpit nga site.
Mikabat sa 500 ka indibidwal gihapon ang quota matag adlaw nga gitagana sa COMELEC-Davao City alang niini.
Kahinumduman nga gibalhin sa ahensya ang registration site alang sa Unang Distrito aron mas maluagan ang pila sa mga tawo sa ilang field office sa Magsaysay Park.
Ang mga rehistrante gikan sa Ikaduha ug Ikatulong mga Distrito ang ginaakomodar karon sa Magsaysay Park.
Samtang, magpadayon gihapon sa pagdawat sa mga rehistrante ang mall registration site hangtod adlawng Sabado, Oktubre 30, deadline sa extended voter registration alang sa 2022 National and Local Elections.
