DAVAO CITY – Gipamulta ang upat ka mga business establishment sa Dahican Beach Resort sa Dakbayan sa Mati, Davao Oriental. Tungod kini sa mga kalapasan sa minimum health standards.
Sumala sa City Information Officer sa Dakbayan nga si Ben Tesiorna, mismong ang Mati Police ang nagtunol niini.
Nasayran sa Mati LGU na ang usa sa mga estabisyamento nga Shrimparty nga gipanag-iyahan sa usa ka Johan Calderon ang nagpahigayon og grand opening niadtong Sabado.
Nag-post usab kini og video, nga na-delete na, nga ang mga parokyano naglingaw-lingaw sa jamming ug sa pag-inom samtang nagtapok-tapok sa mga lamesa ug wala pay mga suot nga protective coverings sa nawong.
Ang maong event, walay pagtugot sa Mati Incident Management Team. Nasuta usab sa Mati LGU nga wala kini business permit gikan kanila.
Laing tulo ka food stalls usab ang giisyuhan og ticket sama sa Tiendahan Food Court, Frynally, ug Josh Snack Haus gumikan sa paglapas niini sa City Ordinance 427, kon Disiplina Panahon sa Pandemya Ordinance.
Giawhag usab ang mga natunulan og ticket nga bayran ang multa sulod sa lima ka working days.
