DAVAP CITY – Gi-awhag sa Department of Transportation (DOTr) ang mga kababaenhan nga mo-apply isip bus drivers alang sa P18.6 billion High Priority Bus System (HPBS), isip kabahin sa pagpanigkamut sa ahensiya nga ma-promotar ang gender equality.
Sumala pa kang Nicole Erika Cue, DOTr community development officer, nga laraw sa lokal nga kagamhanan nga ma-incorporate ang gender and development (GAD) dungan sa pagpatuman sa HPBS, usa ka programa diin tumong niini nga ma-modernize ang public transportation dinhi sa dakbayan.
Gi-awhag sa DOTr ang mga kababaenhan human nasayran sa ahensiya nga daghanan sab sa mga nahisgutan ang adunay kasayuran sa pagmaneho.
Una ng gibutyag ni Norman Baloro, commissioner sa Presidential Commission for the Urban Poor, nga tumong sa HPBS project nga masolusyonan ang paghuot sa dagan sa trapiko sa siyudad diin kinahanglan nila ang 3,000 bus drivers.
Gitataw sab ni Cue nga hatagan nila ug prayoridad ang mga jeepney drivers sa himuon nga hiring sa bus drivers sanglit daghan sa mga nahisgutan ang nawad-an ug panginabuhian sa higayon nga hingpit na nga sugdan ang HPBS.
Gikonsidera sa ahensiya ang mga concerns sa vulnerable sector kalakip na sa senior citizens, mga inahan, buntis nga mga babaye ug persons with disabilities sa gidisenyo nga mga buses, terminals ug bus stops alang sa HPBS project.
