DAVAO CITY – Nagpasidaan ang Davao City Disaster Risk Reduction and Management Office ngadto sa publiko kalabot sa mga posibleng pagbaha ug pagdahili sa yuta gumikan sa kanunay ug walay undang nga pag-ulan panahon sa La Niña.
Ginapa-ignmat usab sa hepe sa CDRRMO nga si Alfredo Baluran, ang mga nanimuyo sa hazard-prone areas sanglit sila ang grabehang maapektuhan sa mga pagdaut sa panahon.
Gilauman usab sa buhatan nga ang mga walay undang nga ulan, inubanan sa pagpanalugdog ug pagpangilat ang mulungtad pa hangtod sa unang quarter sa 2022.
Ning bag-uhay lang, nasinatian sa pipila ka bahin sa Davao Region ang pagkuso-kuso nga hatod sa hanging ginabira sa Severe Tropical Storm Maring samtang nagalihok kini pagawas sa Philippine Area of Responsibility.
Gani, pipila ka mga punuan, panimalay ug uban pang mga gambalay ang nangatumpag tungod sa kusog nga hangin.
Samtang, nawad-an pa og kuryente ang pipila ka dapit sa Davao del Sur tungod niini.
Sa Davao Oriental usab, nangabanlas ang mga barko ug lantsa, ug nangaguba pa kini tungod sa tidal flooding.
