DAVAO CITY – Gibutyag ni Rachel Remitio, Department of Trade and Industry (DTI)-Davao Director nga magpahigayon ang ilang buhatan sa mosunod nga bulan ug Christmas lights monitoring sa pipila ka mga tindahan sa dakbayan.
Sumala pa kang Remitio nga tumong sa nahisgutan nga lakang nga masigurong lihitimo ang ginabaligya nga mga Christmas lights ug dili kini substandard nga mamahimong delikado sa sunog.
Gitambagan sa opisyal ang publiko nga kung mopalit ug mga Christmas lights, mas maayong siguruhon nga aduna kini PS mark o ICC mark.
Himuon sumala pa sa DTI ang inspeksiyon sa mga tindahan kausa matag semana partikular na sa Toril, Buhangin ug uban pang mga dagkong tindahan sa downtown area.
Samtang sugdan na sab sunod nga bulan, ang pag-inspeksiyon sa SRP sa mga Noche Buena.
Mohatag sab sumala pa ang DTI ug tukma nga presyo sa mga Noche Buena items ilabi na nga adunay pipila ka mga konsumante nga hinay-hinay na nga mopalit sa nahisgutan nga produkto isip pagpangandam sa nagsingabot nga kapaskohan.
