DAVAO CITY – Nangandam na sab karon ang dakbayan sa Davao alang sa ipahigayon nga vaccination roll out sa covid-19 alang sa mga nag-edad ug 12 hangtud 17 anyos dungan sa pagsugod niini sa Oktubre 15.
Sumala pa kang Dr. Michelle Schlosser, spokesperson sa Davao City COVID-19 Task Force, gihatagan na sila ug go signal sa national government diin mamahimo na nga sugdan ang pagbakuna sa nahisgutan nga mga edad.
Apan sa kasamtangan, kinahanglan pa nga hulaton ang ipagula nga guidelines sa pre-registration sa mga minor de edad ayha hingpit nga sugdan ang pagbakuna.
Malipayon ang opisyal gumikan kay daghanan na nga mga ginikanan ang nangutana kung kanus-an sugdan ang pagbakuna sa mga batan-on.
Apan una ng gibutyag sa Department of Health (DOH) nga gisapinal pa nila ang mga guidelines alang sa pediatric vaccination sa mga nag-edad ug 12 hangtud na sa 17 anyos nga adunay comorbidities isip kabahin sa Priority Group A3.
Gitataw sab sa DOH nga kinahanglan nga magbinantayon ug planohan pag-ayo ang aprubado nga bakuna nga alang sa mga bata.
Kahinumduman nga ang Pfizer ug Moderna ang mga bakuna nga nakakuha ug emergency use authorization alang sa 12 hangtud 17 anyos nga gi-isyu sa Philippine Food and Drug Administration (FDA) ug adunay equitable access sa medical clearance gikan sa physician alang sa mga bata nga adunay comorbidities.
