DAVAO CITY – Padayon karon nga nadungagan ang ihap sa mga natakdan ug Delta variant sa Davao region diin sa kasamtangan, miabot na kini karon sa kapin 123.
Kahinumduman nga una ng gibutyag ni Dr. Rachel Joy Pasion, Head sa Regional Epidemiology and Surveillance Unit sa Department of Health (DOH) nga subay sa ulahing datus sa ahensiya, pinakadaghan nga nakatala niini ang Davao del Norte nga anaa sa 45 cases, Davao City adunay 32 ka mga kaso samtang ikatulo ang Davao Oriental nga adunay 26 ka kaso.
Sa nahisgutan nga mga ihap, kadaghanan niini ang mga local cases nga anaa sa 114, anaa sa tulo ang padayon nga gi-verify samtang unom ang Returning Overseas Filipino (ROF).
Anaa na sab sa lima ang natalang namatay diin tulo niini ang sa Davao City ug tag usa gikan sa Davao del Norte ug Davao de Oro. Sa kasamtangan okupado pa gihapon ang DOH sa sa ilang gihimo nga mga lakang aron lamang kapugngan ang pagsaka sa Delta Variant ug sa uban pang kaso sa Covid-19.
Subli nga gipasabot sa ahensiya nga bugtong pamaagi lamang nga makalikay sa kagaw mao ang pagtamud sa minimum health protocols.
