DAVAO CITY – Ihatod na sa ulahing kapahulayang dapit ang Davaoeña artist nga si Bree Jonson unyang alas dos sa hapon sa Davao Memorial Park.
Hustisya gihapon ang panawagan sa inahan niini nga si Salome Jonson, kinsa dismayado sa paghupot sa kapulisan kalabot sa imbestigasyon niini sa kaso, ug sa daw pagsilbing tigpamaba sa uyab sa iyang anak ug gituohan niining suspek nga si Julian Ongpin, anak sa bilyonaryo ug kanhi trade minister Roberto Ongpin.
Nasiplatang patay si Bree sulod sa banyo sa kwarto nila ni Julian sa resort sa La Union.
Gi-autopsy usab ang minatay ni Bree, ug nasayrang asphyxia o kakulangon sa oxygen ang gikamatyan niini ug nagpositibo pa sa cocaine.
Apan, dili kumbinsido ang pamilya Jonson niini. Busa, nagpahigayon og kaugalingong autopsy ang National Bureau of Investigation.
Ginapaabot pa sab ang resulta niini. Sa pikas bahin, giklaro ni Julian Ongpin ngadto sa kapulisan ang nahitabo sa nakuha nga CCTV footage sa kapulisan nga daw nag-away kini sa biktima.
Sumala niya, iya lang gipugngang muinom og ilimnong makahubog.
Giingnan usab niya kini nga plano niya muadto sa laing nasud, apan mibabag ang biktima niini. Nakuhaan usab og cocaine ug nagpositibo sa drug test si Ongpin sa adlaw mismo nga nakit-ang patay si Bree.
Nihangyo si Salome Jonson nga mapriso si Ongpin sa kasong illegal drugs, kung dili man kini mabalhog sa prisohan tungod sa alegasyong pagpatay niini sa iyang anak.
