DAVAO CITY – Nagpagula na og opisyal nga pamahayag ang buhatan ni Davao City 1st Dist. Rep. Paolo Z. Duterte kalabot sa pagpositibo niini sa COVID-19.
Sumala sa pahayag, anaa na karon sa usa ka ospital si Pulong alang sa isolation.
Naka-quarantine na usab ang pamilya niini sa ilang pinuy-anan.
Wala usab ginabati nga grabeng sintomas ang Kongresista.
Nagpasalamat usab siya ngadto sa mga nagpadayag og ilang kabalaka, ug nagpasalig kini nga mutuman kini sa quarantine protocols ug magpadayon kini sa pagserbisyo sa iyang mga ginsakpan bisan pa man nga naka-isolate kini.
Kagahapong adlawa, atol sa sinemanang programa sa radyo ni Davao City Mayor Sara Duterte, gibutyag niini nga naigo sa COVID-19 ang iyang igsuong Kongresista.
Kahinumduman usab nga naigo sa susamang kagaw si Vice Mayor Sebastian Duterte, ug gilayon kining nag-isolate.
Nahibal-an lang usab ang nahimong sitwasyon sa Bise Alkalde kaniadto human nga nag-viral ang hulagway diin gikumusta siya sa uban pang miyembro sa pamilya Duterte pinaagi sa usa ka video teleconferencing app.
