DAVAO CITY – Gipakusgan pa sa Davao City Police Office ang ilang mga operasyon kalabot sa pagpatuman sa minimun health standards taliwala sa paspas nga pagsaka sa mga kaso sa COVID-19 sa Dakbayan.
Gani, ilang nasakpan atol sa ilang pagpatrolya ang 51 ka mga tawo nga nag-inom ug wala mituman sa social distancing sa Narra Street, Barangay 30-C ning Dakbayan.
Una pa man niini, nakadawat na sila og reklamo kalabot sa mga naga-inom sa maong dapit matag gabii. Usa sab ni ka iladong tago nga imnanan.
Gikanayon ni Police Captain Rose Aguilar, tigpamaba sa DCPO, nga human gidala ang mga nasakpan sa Santa Ana Police Station, 36 kanila ang gipanghatagan og citation ticket tungod sa paglapas sa liquor ban, ug ang laing 15 nahatagan usab og ticket sa paglapas sa social distancing.
Wala sila gibalhog sa prisohan ug gibuhian dayon, apan gipahimangnuan sila nga bayaran ang multa nga anaa sa ilang citation ticket.
Subling nagpasidaan sa publiko ang kapulisan nga ang mga susamang aktibidad, hinungdan sa transmission sa COVID-19.
Ginapatuman sa Dakbayan sa Davao ang 24-hour liquor ban ug curfew hours nga alas 9 sa gabii hangtod alas 4 sa buntag, ug mulungtad kini hangtod na sa Disyembre 31, 2021.
