DAVAO CITY – Gikumpirma sa Department of Education XI nga mukunhod pa ang ihap sa mga tunghaan sa Davao Region nga malakip sa pagpahigayon og pilot testing sa limited face-to-face classes.
Sa karon, anaa sa 18 ka mga eskwelahan ang tugutan nang magpahigayon niini, apan nagapabiling babag niini ang posibleng kalit nga pagsaka sa mga kaso sa COVID-19 sa dapit diin nahimutang ang tunghaan.
Ipailalom pa og usab sa cross checking ug verification ang mga tunghaan aron masala pa kini og taman.
Wala pa usab kumpirmadong petsa alang sa pagpahigayon sa pilot testing sa pagbalik sa physical classes, apan nagpasalig si DepEd Secretary Leonor Briones nga mapahigayon kini sa kasamtangang school year.
Giangkon usab sa buhatan nga mag-agad lang sa quarantine classification sa usa ka lugar ang pagpatuman sa face-to-face classes.
Gipasabot usab nila sa publiko nga bugtong mga natinong low risk areas lang ang tugutan nga magpahigayon og pisikal nga klase.
Gibutyag usab sa DepEd sa Kauluhan nga gikan sa inisyal nga 1,500 public schools nga giaprubahan alang niini, anam-anam kining nakunhuran hangtod sa lapas 100 na lang ang nahibilin human sa validation sa Inter-agency Task Force kon IATF.
