DAVAO CITY – Gilauman nga mubalik na sa operasyon ang Automated Extraction Machine sa Southern Philippines Medical Center Molecular Laboratory human kini naguba gumikan sa kanunayng paggamit niini.
Niabot na sab ang technician nga muayo niini. Gipasabot usab ni SPMC Chief Dr. Ricardo Audan nga gikan pa sa Iligan, Cagayan, ug Bukidnon ang tig-repair sa ilang makina, nga niatiman usab sa mga nagubang ekipo sa nasangpit nga mga lugar.
Samtang ginapaabot nila nga maayo kini, walay undang usab ang mano-manong pagproseso sa mga swab sample matag adlaw, apan nakunhuran og 2,000 samples per day ang ilang maproseso.
Busa, 600 to 1000 samples lang ang ilang makaya matag adlaw.
Kini usab ang gilaraw ni Audan nga hinungdan nganong dili kaayo puno-puno og COVID-19 patients ang SPMC.
Apan, giklaro usab niya nga nagpabiling anaa sa critical level ang bed capacity sa ospital Gikanayon usab ni COVID-19 Task Force Spokesperson Dr. Michelle Buscato-Schlosser nga mga city-owned ug private molecular laboratories ang nagpabiling nagaproseso og swab samples samtang nahimong limitado ang output sa SPMC.
