DAVAO CITY – Gipaklaro karon ni Davao City COVID-19 Task Force Spokesperson Dr. Michelle Buscato-Schlosser nga mandatory gihapon ang pagsul-ob og face shield ngari sa Dakbayan sa Davao, bisan pa man aduna nay pamayahag si Presidente Rodrigo Duterte nga dili na require ang paggamit niini sa gawas, apan kinihanglan gihapon kini sa closed ug crowded areas, ug sa mga dapit nga adunay close contacts.
Matud niya, wala pa silay nadawat nga kamanduan gikan kang Mayor Sara Duterte o sa Sangguniang Panlungsod nga tangtangon na ang face shield requirement sa Dakbayan.
Gipasabot usab ni Schlosser nga subay sa guidelines gikan sa Department of Interior and Local Government, kinahanglan adunay executive order o di kaha ordinansa gikan sa lokal nga panggamhanan aron mapatuman kini.
Daan nang gipanghingusgan sa ubay-ubay ka mga medical expert nga bisan pa man gamay nga percentage lang ang mahatag nga proteksyon sa face shields, mas maayo gihapon kung magsuot niini isip dugang proteksyon sa COVID-19 infection.
Mao usab kini ang gipunto kaniadto ni Presidente Rodrigo Duterte ayha kini namahayag nga limitahan ang paggamit na niini.
