DAVAO CITY – Nag-abiso ang Davao City Disaster Risk Reduction and Management Office kon CDRRMO ngadto sa mga Dabawenyo nga lauman na ang makanunay nga mga pag-ulan gumikan sa pagsulod sa La Niña sa ulahing quarter ning kasamtangang tuig.
Niadtong Dominggo lamang, nakasinati og kusog ug dugay nga pag-ulan ang Dakbayan sa Davao ug ang tanang probinsya sa Davao Region, nga miresulta sa halapad nga pagbaha sa pipila ka bahin niini.
Sumala sa hepe sa CDRRMO nga si Alfredo Baluran, kinahanglan nang mangandam sa katawhan sanglit dala sa La Niña phenomenon ang above-normal nga pagbundak sa ulan, nga posibleng mamahimong hinungdan sa pagbaha ug pagsaka sa lebel sa tubig sa mga suba.
Ginapaigmat usab ni Baluran ang mga nanimuyo sa landslide-prone ug flood-prone areas, ilabi na nga kasagarang gabundak ang ulan sa hapon hangtod na sa gabii.
Nagpasalig usab si Baluran nga kanunayng nakaalerto ang CDRRMO ug ang Barangay responders sa mga masinatiang pagdaut sa panahon.
