DAVAO CITY – Usa ka big-time drug dealer ang nasikop sa operasyon sa hiniusang kusog sa Talomo Police Station ug sa Philippine Drug Enforcement Agency sa Barangay Talomo ning Dakbayan sa Davao.
Naila ang dinakpan nga si Rizalde Hernane alias MIGO, 25 anyos, pintor, nanimuyo sa nasangpit nga barangay, ug Top 5 Regional Level Drug Personality sa Drug Watchlist sa PNP ug PDEA.
Nasakmit kaniya ang muabot sa 80 gramos sa ginatuohang shabu nga nakabutang sa 22 ka managlahing sachet.
Aduna kini street value nga mubalor ngadto sa 1 million 280 thousand Pesos.
Nakuha usab gikan sa panag-iya sa dinakpan ang 9,000 pesos nga boodle money, iyang single nga motorsiklo, ug uban pang personal nga gamit.
Sumala sa hepe sa Drug Enforcement Team sa Talomo PS nga si Police Major Sean Logronio, tulo ka semana nilang gipanid-an ang suspek human sila makadawat og taho kalabot sa ginapahigayon niining illegal drug activities.
Nakapansak na karon sa prisohan sa Talomo ang dinakpan, ug nakustodiya na usab ang mga ebidensyang nasakmit gikan kaniya.
Nakatakdang muatubang si alyas MIGO og kasong paglapas sa Section 5 ug 11 sa Republic Act 9165 kon Comprehensive Dangerous Drugs Act of 2002.
