DAVAO CITY – Gibanabanaang dili muubos ngadto sa 5 million pesos ang damyos sa nahitabong sunog sa Dalang Rizal, lungsod sa Lupon, Davao Oriental, Sabado sa kagabion.
Nagsugod ang pag-ulbo sa sunog alas 9:45 sa gabii ug nadeklarang fireout ala 1:40 sa kaadlawon kagahapon.
Tungod sa kadako sa kalayo, niabot pa kini sa 2nd Alarm ayha napakgang sa kabumberuhan.
Sumala sa Lupon Fire Station Fire Investigator nga si Fire Officer 3 Warlito Castillo, Jr. tulo ka mga gambalay nga gilangkuban sa mini grocery store, hardware, ug bakeshop ang naabo samtang usa pa ka hardware ang partially-damaged.
Subay usab sa inisyal nga imbestigasyon, nagsugod sa tunga nga bahin sa bakery ug mini grocery store ang kalayo, apan mas nidako ang kalayo sa bakery sanglit gama sa kahoy ang ikaduhang andana niini.
Walay nangadamay nga lain pang establisyamento ug mga kabalayan sa maong sunog.
Wala usab natalang naangol o nakalas. Sa karon, padayon pang gina-imbestigahan sa kabumberuhan ang hinungdan sa maong sunog.
