DAVAO CITY – Giaksyunan na sa Provincial Government sa Davao Occidental ang isyu sa mga daot nga ayuda nga ilang gipanghatag ngadto sa mga residente sa lungsod sa Santa Maria, diin ubay-ubay ka mga barangay ang naka-hard lockdown sa kasamtangan.
Nangayo na usab og pasaylo ang Davao Occidental LGU tungod sa pagka-overlook sa mga nadaot nang relief goods.
Gikanayon ni Davao Occidental Provincial Information Officer Carlos Casaysay nga wala nabantayan ang mga nadaot nang relief goods sulod sa ilang stock room sanglit nakabutang kini sulod sa mga karton.
Matud niya, posible usab nga nangadaot ang mga gipanghatag nga ayuda gumikan sa nagakambyo-kambyong lakat sa panahon.
Ginasuta na usab nila kung pipila ka mga pamilya ang natunulan nila og daot nga ayuda, ug nagpasalig usab sila nga ilang kambyoan ang mga nahisgutang relief package.
Mihangyo usab siya sa ilang sakop nga idangop diretso sa ilang buhatan ang susamang mga isyu aron maaksyunan dayon inay i-post sa social media.
Kalabot niini, kahinumduman nga adunay residente nga nagreklamo pinaagi sa iyang post tungod nangadaot na ang ilang gihatag nga ayuda og dili na makaon pa.
