DAVAO CITY – Nasikop sa mga personahe sa Tugbok Police Station ang usa ka babayeng suspek nga nangdikwat og kwarta sa lain pang babaye nga namalit og ukay-ukay sa usa ka tindahan sa Barangay Mintal ning Dakbayan alas 10:30 sa buntag kagahapon.
Nailhan ang dinakpan nga si Dolores Dela Calzada, 61 anyos, lumulupyo sa Barangay 23-C, Quezon Boulevard ning Dakbayan sa Davao.
Giila usab ang iyang nabiktima nga si Nelinda Olmedo, 62 anyos, lumulupyo sa Barangay Tugbok Proper, ning Dakbayan.
Subay sa imbestigasyon sa kapulisan, samtang nangukay ang biktima, nagpaka-aron ingnon ang suspek nga duna pay kuyog nga usa pa ka babaye, ug gikuot niini ang kwarta sa biktima nga mukantidad og 4,600 pesos.
Sumala ni Police Major Ricky Obenza, nagdinaganay pagawas sa tindahan ang suspek nga gigukod sa biktima.
Gikatingalahan kini sa mga tawo, ug sakto nga adunay pulis sa maong dapit, hinungdan nga nadakpan ang suspek samtang nakaikyas ang kauban niini.
Pansak na karon sa prisohan ang suspek nga mag-atubang og kasong pagpangawat sa korte.
