DAVAO CITY – Isaulog na karong adlawa ang ika-36th Kadayawan sa Davao Festival apan sama sa milabay nga tuig, mamahimong virtual o online ang mga aktibidad gumikan kay napabilin pa gihapon ang hulga sa covid-19.
Una ng gi-awhag ni Davao City Mayor Inday Sara Duterte-Carpio ang mga dabawenyo nga makighiusa sa kasaulogan gumikan kay makita pa gihapon sa online ang pipila ka mga aktibidad nga nahimo ng kabahin sa Kadayawan matag tuig.
Kalakip sa mga i-pasundayag ang kultura ug tradisyon sa napulo ka tribu sa siyudad nga maoy highlights matag ipahigayon ang kapiyestahan sa dakbayan.
Kahinumduman nga sa milabay nga mga katuigan nahimong kabahin sa kasaulogan ang mga tribal houses nga nahimutang sulod sa Magsaysay Park ning siyudad diin makita kung unsa ang hitsura ug pamaagi sa paghimo niini.
Highlight sab ang tradisyonal nga mga dula sa mga lumad ug daghanan pa ingon man ang mga pagkaon ug mga nagkadaiyang variety sa Durian.
