DAVAO CITY – Gisugdan na kagahapong adlawa sa lokal nga kagamhanan ang Davao City mobile vaccination alang sa mga senior citizens inabagan sa ahensiya sa Department of Health.
Kagahapong adlawa anaa sa 35 senior citizens ang gibisita sa ilang pinuy-anan ug malampuson nga nabakunahan.
Sa nahisgutan nga ihap, 17 niini ang gikan sa Golden Haven Retirement Home, Riverside Calinan District, samtang 18 ka mga senior citizens ang gikan sa Pleks Good Shepherd Care Home sa Pacific Ocean St., Gulfview Executive Homes, Bago Aplaya.
Gigamit ang bakuna nga Johnson & Johnson (J&J) single-dose Janssen Covid-19 vaccines ngadto sa mga senior citizens.
Gipahigayon sa lokal nga kagamhanan ang nahisgutan nga lakang kini aron nga dili na malisdan ang mga senior citizen nga moadto sa mga vaccination site ug sa ilang tagsa-tagsa ka mga panimalay na lamang kini bisitahon aron nga bakunahan.
Gawas sa mga tigulang, una na sab nga nagpahigayon ug mobile vaccination alang sa mga tricycle drivers sa pipila ka distrito sa dakbayan.
