DAVAO CITY – Subling nagpahinumdom karon ang mga health care workers sa dakbayan nga doblehon pa ang pag-amping kini human nga adunay duruha ka bag-ong natalang kaso sa Delta variant sa siyudad nga mas makatakod nga klase sa Covid-19 Delta variant sa siyudad.
Sumala sa Department of Health 11 regional office (DOH 11) nga ang duruha ka Delta variant cases mao ang usa ka 47 anyos nga lalaki nga nakagawas na sa hospital apan gidala sa Temporary Treatment and Monitoring Facility (TTMF) gumikan sa pending niini nga RT-PCR test results.
Samtang ang lain usa mao ang 36 anyos nga babae nga na-discharge kaniadtong Hulyo 21 ug gidala na sab karon sa isolation facility gumikan kay gihulat pa sab ang iyang RT-PCR test results.
Ang bag-ong duruha ka Delta variants ang subay sa report sa University of the Philippines – Philippine Genome Center’s (UP-PGC) Whole Genome Sequencing (WGS) sa milabay nga semana diin kalakip sab sa mga na-detec ang 48 ka kaso sa Alpha variant ug 128 ka kaso sa Beta variant.
Tungod niini nanawagan ang DOH sa tanan nga mga Local Government Units (LGUs) sa rehiyon nga pahugtan pa ang quarantine protocols, testing ug isolation.
Gi-awhag sab niini ang publiko nga magpabakuna ug siguruhon nga makompleto ang duruha ka doses aron nga maangkon ang igong proteksiyon batok sa kagaw.
