DAVAO CITY – Gi-andam na ang kaso batok sa negosyante nga taga-Cavite kinsa nasikop sa mga personahe sa Task Force Davao (TFD) human nga nakuhaan kini ug armas.
Gipangunahan ang operasyon sa kasundalohan ug kapulisan sa Lasang checkpoint, barangay Lasang kagahapong adlawa.
Giila ni TFD spokesman Captain John Louie Dema-ala ang suspek nga si Jazer Nachor Espartero, 32 anyos ug residente sa B37 L16 freedom Vile Subdivision, Bucana Sasahan, Naic, Cavite.
Sakay ang suspek sa Mitsubishi Estrada ug paingon kini dinhi sa siyudad dihang gibabagan alang sa inspeksiyon sa area sa Lasang checkpoint.
Narekober sa posisyon niini ang caliber. 45 pistol ug usa ka magazine nga gi-undan ug pito ka mga bala.
Sa pikas nga bahin, lain pang 38 anyos nga lalaki nga Nueva Ecija ang nadakpan sa checkpoint human nga naghupot ug P13,200 nga kantidad sa Marijuana.
Ang suspek nga si Arnel Alberca Pacquiao, residente sa 0621 Barangay Bitas, Cabanatuan City, Nueva Ecija ang sakay sa Ford Ranger ug pasulod sab sa siyudad dihang nasikop kini sa Lasang checkpoint.
Gidayeg sab ni Colonel Darren Comia, commander sa TFD ang iyang mga tropa diin ang nahisgutan nga kalampusan usa sumala pa ka pagpakita nga determinasyon sa TFD personnel sa ilang mga ginapahigayon nga checkpoint operations.
