DAVAO CITY – Gibutyag ni Davao City Mayor Inday Sara Duterte-Carpio nga nag-agad lamang karon ang lokal nga kagamhanan sa School Division sa Department of Education (DepEd)-11 kung itugot na sab karon sa dakbayan sa Davao ang Face to Face classes pag-abot sa bulan sa Setyembre human nga gitugot na kini ni Pangulong Rodrigo Duterte ilabi na sa mga lugar nga ubos lamang ang natalang kaso sa covid-19.
Hinuon gikanayon sa Mayor nga kadaghanan karon sa mga magtutudlo ang nakapabakuna na batok Covid-19 apan adunay pipila niini ang wala pa nakapailalom posibleng maabtan pa kini ug bulan sa Setyembre.
Aduna sab sumala pay uban nga mga magtutudlo ang wala nagpabakuna ilabi na nga dili sab mamahimong pugson ang mga nahisgutan.
Apan gibutyag ni Mayor Inday nga kung unsa man ang desisyon sa DepEd-11, andam nga motamud niini ang lokal nga kagamhanan ilabi na nga kalakip lamang sa mamahimong rekisitos niini mao ang kompleto nga bakuna, social distancing ug uban pang sumbanan sa health protocols.
