DAVAO CITY – Gipasalig sa ahensiya sa Department of Labor and Employment (DOLE)-11 nga tabangan nila ang mga food delivery riders sa Food panda nga una ng naglusad ug lihok protesta sa Roxas ning siyudad aron nga ipasibaw ang ilang mga mulo batok sa kompanya.
Kahinumduman nga una ng nanawagan ang mga nahisgutan nga dungan ang ilang delivery fee matag adunay transaksiyon sanglit kulang sumala pa kini gumikan kay adunay mga panahon nga kinahanglan nila ug maintenance sa ilang mga motor, gasolina ingon man kaugalingon sab nila nga gasto ang load sa ilang cellphone nga gamiton sa ilang transaksiyon sa ilang mga kustomer. Halos wala na matud pa silay mauli sa ilang pamilya gumikan sa kagamay sa ilang kita.
Gumikan kay duruha ka adlaw nga wala mitrabaho ang mga nahisgutan, suspendido sumala pa ang mga riders sa paggamit sa ilang mobile app hangtud tuig 2031.
Gibarugan sa pamunoan sa Food panda nga pagsupak sumala pa sa ilang freelance agreement ang gihimo sa mga riders.
Gumikan kay ubay-ubay ang nawad-an na ug trabaho, gilayon nga mipatunga ang DOLE aron nga matabangan ang mga nahisgutan.
Sumala pa kang Atty. Connie Beb Torralba, mediator arbiter, Dole-11, nga abli ang ahensiya aron nga ipailalom ang mga apektadong rider sa TUPAD program sa kagamhanan aron nga magbaton ug income ang mga nahisgutan samtang wala pa nahatagan ug kasulbaran ang ilang mga mulo.
