DAVAO CITY – Paningkamutan karon sa dakbayan sa Davao nga hingpit ng madeklara ang siyudad isip Malaria free kini human nga pipila ka tuig na sab nga wala nakatala ang dakbayan ug kaso niini.
Una ng gibutyag ni Melodina Babante, Pest control worker II sa City Health Office (CHO) nga sa Davao region, bugtong ang siyudad na lamang ug lalawigan sa Davao del Norte ang wala gideklara isip Malaria-free sa rehiyon.
Una ng nasayran sa nahisgutan nga kaniadtong tuig 2017 pa ulahing nakatala ang dakbayan sa Davao o upat ka tuig na ang milabay nga wala nay natalang kaso sa Malaria.
Nagtoo ang opisyal nga kung hingpit na nga ideklara nga malaria free ang siyudad partikular na ang Marilog district, laoman nga mas molambo pa ang turismo sa nahisgutan nga dapit ilabi na nga daghanang nindot nga lugar ang mamahimong kasuruyan sa maong dapit.
Hinuon padayon karon ang kampanya sa ahensiya pinaagi sa paghatag ug igong kasayuran sa publiko kalabot sa sakit nga Malaria.
